Imikino Magazine yatoranyije abakinnyi XI bahize abandi muri 2019 ku mugabane w'Uburayi batarimo Cristiano Ronaldo

By Mugisha Aimé-Thierry Dec 31, 2019 02:18am 741 Views

Imikino Magazine yatoranyije abakinnyi XI bahize abandi muri 2019 ku mugabane w'Uburayi batarimo Cristiano Ronaldo


Mbere yuko dusoza umwaka wa 2019 ku mugaragaro twashizemo ku gutegurira ikipe yaranze umwaka uyu mwaka mu marushanwa yose aho twarebeye hamwe abakinnyi 11 bitwaye mu marushwanwa yose. Twagendeye uko buri mukinnyi yitwaye muri uyu mwaka gusa. Aho twanagaragaje umutoza w'umwaka  kurusha abandi mu marushanwa yose akinirwa ku mugabane w'Uburayi.

Muri iyi kipe twakoresheje formation [tactic] ya 4-3-3 aho hari ba myugariro bane, abo mu kibuga hagati batatu n'abataka batatu muri rusange. Hibanzemo abakinnyi baturuka muri shampiyona y'Ubwongereza cyane kurusha irindi rushanwa iryo ariryo ryose.

Umuzamu: Allisson Becker (Liverpool, England)

Twitegereje ibyo Becker yakoze muri Liverpool muri uyu mwaka akanayifasha kwegukana igikombe cya UEFA Champions League birahambaye cyane ku mukinnyi wari ukigera mu ikipe ari mushya. Uyu muzamu yitwaye neza cyane muri 2019 nubwo nyuma mu mpera z'umwaka atahiriwe cyane.

Myugariro: Trent Alexander-Arnold (Liverpool, England)

Umwe muri ba myugariro bakina ku ruhande rw'iburyo bigaragaje cyane muri uyu mwaka w'imikino nyuma yo kuba myugariro wa mbere wakoze uburyo bwinshi bubyara igitego akanatanga imipira myinshi ivamo ibitego ku mugabane w'Uburayi.

Myugariro: Andrew Robertson (Liverpool, England)

Uyu musore kuva ku ntangiro z'uyu mwaka yabaye umukinnyi udasimburwa mu ikipe yakinagamo aho yakomeye kugenda yitwara neza cyane. Yabaye umukinnyi uhozaho kurusha undi mukinnyi uwo ariwe wese ku mugabane w'Uburayi, buri munsi w'imikino yazaga yisumbuyeho.

Myugariro: Virgil van Dijk (Liverpool, England)

Kugeza ubu dukomeje kubona mo abakinnyi benshi ba Liverpool nk'ikipe yegukanye igikombe cya Champions League, Super Cup na Club World Cup. Virgil muri uyu mwaka nawe yabaye myugariro w'akataraboneka ndetse mpamya ko ari umwe muri ba myugariro bagize umwaka w'agahebuzo mu mateka ya ruhago ku mugabane w'Uburayi. Yakoze impinduka zikomeye muri Liverpool.

Myugariro: Aymeric Laporte (Manchester City, England)

Abenshi bari biteze ko bagiye kuhasanga Kalidou Koulibaly, sibyo? Koulibaly yarakoze cyane ariko sinzi impamvu abantu benshi batabona uburyo Laporte yafashije Manchester City muri uyu mwaka byumwihariko kwegukana igikombe cya shampiyona. Kuva yagira ikibazo cy'imvune Manchester City ntabwo yorohewe mu kugarira izamu ryayo.

Abo Hagati: Frenkie de Jong (Ajax Amsterdam/Barcelona, Netherlands/Spain)

Nyuma yo gufasha Ajax Amsterdam kugera muri 1/2 cya Champions League ntabwo twabura kumugarukaho kandi kuva yanakwerekeza muri Barcelona akomeje kuba umwe mu bakinnyi beza cyane ku mugabane w'Uburayi aho yaranzwe no guhozaho ndetse agakomezanya urwego yari ariho.

Abo Hagati: Fernandinho (Manchester City, England)

Ahangaha na none abantu benshi baraza kwibaza impamvu Fernandinho agarutsemo ariko ndababwiza ukuri ko iyo bitaza kuba uyu musore Manchester City ntabwo yakabaye yaratwaye igikombe cya shampiyona. Yarayifashije cyane bigera naho yabuze igahura n'ibibazo ariko yagaruka bigatungana. Yakinnye imyamya itandukanye muri iyi kipe. Mu by'ukuri yaranyigaragarije byo ku rwego rwo hejuru cyane.

Abo Hagati: Lionel Messi (Barcelona, Espagne)

Kizigenza wa FC Barcelona, ibyo yakoze muri uyu mwaka byo ntabwo nakwirirwa mbitindaho kuko niwe mukinnyi wa gatatu nyuma ya Abdurlazaki na Lewandowski watsinze ibitego byinshi muri uyu mwaka byumwihariko yegukanye Ballon d'Or na FIFA The Best Award.

Abataka: Raheem Sterling (Manchester City, England)

Raheem Sterling yabaye intwaro ya Pep Guardiola kuva muri Gashyantare kugeza begukanye igikombe cya shampiyona by'umwihariko ari mu abakinnyi batsinze ibitego byinshi muri uyu mwaka. Nubwo ubu adahagaze neza cyane muri shampiyona ariko aratsinda. Muri make navuga ko uyu ariwo mwaka nabonye Sterling utangaje cyane aho bamwe batangiye no ku mugereranya n'abakinnyi bakomeye ku mugabane w'Uburayi.

Abataka: Robert Lewandowski (Bayern Munchen, Germany)

Rutahizamu w'umwaka wa 2019 nta gushidikanya. Wenda ntabwo yawutangiye neza ariko awusoje neza nubwo yagize ikibazo cy'imvune. Uyu niwe watsinze ibitego byinshi ku mugabane w'Uburayi mu marushanwa yose. Ni rutahizamu wagaragaje guhozaho kuva uyu mwaka w'imikino watangira afasha na Poland kubona itike ya Euro 2020.

Abataka: Sadio Mane (Liverpool, England)

Reka dusozereze kuri uyu musore ukomoka muri Senegal wigaragaje cyane muri uyu mwaka. Nyuma yo gufasha Senegal kugeza ku mukino wa nyuma w'igikombe cy'Afurika cyegukanwe na Algeria aza no kwitwara neza muri Premier League na Champions League byumwihariko nanubu aracyameze neza kuva mu ntangiro zuyu mwaka.

Uko ikipe ihagaze muri rusange

1. Allison Becker (Liverpool, England)

2. Trent Alexander-Arnonld (Liverpool, England)

3. Andrew Robertson (Liverpool, England)

4. Virgil van Dijk (Liverpool, England)

5. Aymeric Laporte (Man City, England)

6. Frenkie de Jong (Barca/Ajax, Spain/Netherlands)

7. Fernandinho (Man City, England)

8. Lionel Messi (Barcelona, Spain)

9. Raheem Sterling (Man City, England)

10. Sadio Mane (Liverpool, England)

11. Robert Lewandowski (Bayern Munchen, Germany)

Umutoza w'umwaka ni Jurgen Klopp wa Liveppool

Abandi bakinnyi bagera kuri barindwi bitwaye neza muri 2019

1. Ederson Moraes (Man City, England)

2. Matthijs de Ligt (Juventus/Ajax, Italy/Netherlands)

3. Kylian Mbappe (Paris SG, France)

4. Mohamed Salah (Liverpool, England)

5. Bernardo Silva (Man City, England)

6. Eden Hazard (Chelsea/Real Madrid, England/Spain)

7. Cristiano Ronaldo (Italy, Juventus)

Imikino Magazine ikwifurije umwaka mushya muhire wa 2020 wowe n'abawe bose


1 Comments

Peter

December 31st, 2019 - 9:29AM

Iyi kipe yanyu irimo ubusesenguzi budahagije rwoseee!!!!

Gira icyo ubivugaho


INKURU BIJYANYE


By Kwizera Yamini
Nov 8, 2017 1918 Views

By Kwizera Yamini
Nov 9, 2017 1404 Views

By Kwizera Yamini
Nov 28, 2017 2133 Views